Басты бет / Басқа түрлер / АЛМАТЫДА «ҚЫРАН-2018» ҚҰСБЕГІЛЕР ТУРНИРІ БАСТАЛДЫ

АЛМАТЫДА «ҚЫРАН-2018» ҚҰСБЕГІЛЕР ТУРНИРІ БАСТАЛДЫ

Бүгін Алматы қаласының ипподромында ұлттық спорт түрінен «Қыран-2018» атты құсбегілердің республикалық турнирінің іріктеу кезеңі өтті, деп хабарлайды ақпараттық және спорттық ХАБ.

Руxани жаңғыру аясында өтіп жатқан киелі жарыстың салтанатты ашылу рәсіміне Алматы қаласы дене шынықтыру және спорт басқармасының өкілдері, «Қыран» Федерациясының өкілдері және ұлттық спорт түрлерінің жанашырлары қатысып, құттықтау сөздерін жеткізді.

— 1988 жылы Алматының Орталық стадионында тұңғыш рет қазақ құсбегілерімен қатар,  көршілес қырғыз, түркімендер қатысқан Халықаралық Бүркітшілер фестивалі ал, 1989, 1990 жылдары Наурыз  мейрамы аясында Алматы ипподромында бүркітшілердің республикалық  сайысы өтіп еді. Содан бері, отыз жылға жуық мерзімде Алматы қаласының аспанында киелі Қыранның самғауын халқымыз тамашалаған жоқ. Міне, бүгін еліміздің он аймағынан Алматыға бақ сынасуға келген бүркітшілерге алғысымызды білдіреміз. Қанаттарыңыз талмай, биікке самғай берсін, — деп тілек білдірді «Қыран» Федерациясының атқарушы директоры Бағдат Мүптекеқызы.

Айтулы доданың басты мақсаты осынау жақсы үрдісті еліміздің мәдени, рухани ордасы – Алматы қаласында қайта жаңғыртып, қолға алу мақсатында, биылдан бастап Қыран құс баптаушылардың жарысын өткізуді дәстүрге айналдыру.

Республикалық турнирге Ақмола, Атырау, Шығыс Қазақстан, Қарағанды, Оңтүстік Қазақстан, Жамбыл, Алматы облыстары мен Астана қаласынан 60-қа жуық құсбегілер қатысуда.

Бүгін бірінші іріктеу кезеңінде көрермендер құсты ат үстінен қолға шақыру, шырға тарту сияқты құсбегілер мен бүркіттердің керемет өнерін тамашалады. Ал жартылай финалда іріктелген бүркіттер шешуші кезеңде қоянға, түлкіге салынса, жарыстың екінші кезеңінде қаршыға мен ителгілер қолға шақырылады, көгершінге, қоянға жіберіледі.

Қатысушылардың жас ерекшеліктеріне ешқандай шектеу жоқ, тіпті, 12 жастағы баладан 70 жастағы ақсақалдар да баптаған бүркіттерімен сынға түсті. Олардың ішінде ең жас құсбегінің бүркіті өзімен жасты екен.

— Менің жасым 12-де, бүркітім де шамамен сол жаста, есімі Дауыл. Осындай республикалық сайысқа бірінші рет қатысып жатырмын. 8-9 жасымнан бастап құсбегілікпен айналысамын. Әкем бүркіт баптауды үйреткен, содан бері осы іске әуестене бастадым. Жалпы бүркітімді күнара таза, тұздалмаған етпен асыраймыз. Оқуыма бөгет болмайды, өйткені бос уақытымда айналысамын, негізі әкем бүркітті асырайды. Үйге олжамен ораламын деген ойдамын, — деп бөлісті Алматы облысының қатысушысы Ерсұлтан Жұмағұл.

Республикалық турнирдің үздіктері ақпанның 10-ы  күні анықталады.  Жарыс жеңімпаздары мен жүлдегерлері Алматы қаласы Дене шынықтыру және спорт басқармасының және «Қыран» Федерациясының атынан медальдармен, мақтау қағаздарымен марапатталады.

 

Сондай-ақ

ИБРАГИМ ЕСКЕНДІР РЕСЕЙЛІК БОКСШЫНЫ ТІЗЕ БҮКТІРДІ

Танымал қазақстандық әнші Ибрагим Ескендір кәсіпқой рингтегі кезекті жеңісіне қол жеткізді. Ресей астанасы Мәскеуде өткен …

Добавить комментарий